Psa 38 | YomNWM | STEP | Nkunga Davidi mu diambu di thebokolo moyo. A Yave, kadi kuthemima ku tsi nganzi aku voti kadi kuphana thumbudulu ku tsi nganzi aku yi kikhesa.

Psalms 38

Wuyamusu kuidi kimbevo ayi masumu

Nkunga Davidi mu diambu di thebokolo moyo.

1 A Yave, kadi kuthemima ku tsi nganzi aku
voti kadi kuphana thumbudulu ku tsi nganzi aku yi kikhesa.
2 Bila madionga maku mathobudi
ayi koko kuaku kumbetidi.
3 Mu diambu di nganzi aku yi kikhesa, buvini buisi ko mu nitu ama.
Mimvesi miama misiedi ko buvini
mu diambu di masumu mama.
4 Zinzimbala ziama zimfietikisidi ngolo
banga mfuna widi zitu kiwombo ;
madidi ngolo zitu mu diambu diama
banga mfuna wu ngolo.
5 Ziphuta ziama zilembo bodi ngolo yiwombo
ayi zilembo yizi tsudi yiwombo
mu diambu di buvulu buama bu masumu.
6 Ndidi wukomvama ngolo ayi khulukidi nate va tsi ;
Lumbu ki mvimba mu kiadi ndieti diatila.
7 Bila ziphasi zingolo zidi mu luketo luama,
buvini buisi ko mu nitu ama.
8 Ndidi wuvonga ngolo ayi ndidi wukosakana mvimba.
Ndilembo kungi mu diambu di ziphasi zi ntima.
9 Zitsatu ziama zioso zidi dio yambi va ntualꞌaku, a Yave,
ayi vumina kuama kuisi ko kusuama kuidi ngeyo.
10 Ntimꞌama wulembo sadi ngolo
ayi zingolo ziama zimeni ;
kiezila kibotukidi mu meso mama.
11 Bakundi bama ayi bobo bankibanga yama
bathinini mu diambu di ziphuta ziama ;
bobo bafikasana yama thama batelimini.
12 Bobo bantomba luzingu luama balembo mintambu miawu
bobo bantomba kuphanga mbimbi
balembo yolukila mbivusu ama ;
Mu lumbu kimvimba balembo kubika mambu ma luvunu.
13 Minu, ndieka banga mutu wufua matu,
wunkambu wa ; banga dibaba dikambu zibula munu andi.
14 Ndieka banga mutu wowo wu nkambu wa
mutu wowo munu wunkambu baka bu vutudila mvutu.
15 Ngeyo ndieti tadidila, a Yave,
wela vutula mvutu, a Yave Nzambi ama.
16 Bila ndituba : “kadi tala ti bamona khini
voti bakiyayisa bawu veka mu diambu diama.
Kulu kuama bu kusialumukini.”
17 Bila nduka bua ndieka
ayi ziphasi ziama zidi kaka mu minu.
18 Ndimfunda mbimbi ama.
Ndilembo niongi mu diambu di disumu diama.
19 Bawombo badi bambeni ziama ; ziozi zibeki zingolo.
Bobo bakundendanga mu kambu bila badi bawombo.
20 Bobo bakuphutudilanga mambimbi mu mamboti mama
balembo thubidila ku ndambu
mu thangu ndinlandakana vanga mamboti.
21 A Yave, kadi kundiekula ; kadi kuthatukila Nzambi ama.
22 Yiza nsualu mu kutsadisa,
A Yave, Mvulusi ama.